الخميس، 14 يوليو 2011

المجلس العسكري عاوز اية؟

احنا مبنتهددش يا فنجرى

بصراحه ياجماعه مش فاهمين بالزبط هو المجلس العسكري عاوز ايه .. من يوم مابدئنا الاعتصامات يوم 8 يوليو وهو مطنش
 ومكبر وعامل نفسه مش واخد باله !! وشويه وطلعلنا عصام شرف يقول بيان مستفز ويؤكد انه فعلا عصام شرف ماعندوش اي صلاحيه من الاخر المجلس حطه يضحك بيه علينا ويسكتنا .

شويه ويوم 12 راح طلعلنا الفنجري ببيان قمه في الاستهتار والاستخفاف بالشعب وقف يرفعلنا صباعه بطريقه كأننا عساكر عنده !! بتهدد مين يافنجري بتهدد الشعب !!!!!!!!!!؟
بتقول المجلس العسكري اخد شرعيته من الشعب ولو افتراضنا ان كلامك مزبوط مع ان الشعب ماطلبش مجلس عسكري وطول الوقت بيقول مدنيه مش عسكريه حتي للفتره الانتقاليه اهو نفس الشعب اللي بتقول المجلس خد الشرعيه منه هو اللي بيقولكم كفايه عليكم كده لانكم ووبساطه مانفذتوش اي حاجه من مطالب الشعب . الشعب ماداش فرصه يوم ولا اتنين ولا شهر ولا اتنين الشعب اداكم فرصه 6 شهور عملتوا فيها ايه ؟ لا محاكمات عادله اتعملت ولا حقوق رجعت بالعكس جيتوا علي الشعب وعلي الثوره !!؟

الشعب المصري مش بيخاف والثوره ليها مطالب مش هنسكت ولا هنتراجع الا لما تتحقق وتتحقق كامله ومتهيألي الشعب المصري اثبتلكم صموده وقوته وعزيمته فياريت بجد المجلس العسكري يتراجع عن موقفه العدائي ويحدد علي وجه السرعه فتره زمنيه لتسليم الحكم لان الشعب وببساطه قوه لا تقهر.




ليست هناك تعليقات:

إرسال تعليق